ᑲᖏᖅᑐᒑᐱᒃ
ᑭᕙᓪᓕᖅ: ᑭᓱᖃᕐᓂᐅᕙᒃᑐᑦ ᐃᓕᖅᑯᓯᕆᓚᐅᑕᖓᑎᑑᓕᖅᑎᑕᐅᓂᖓ ᖃᒪᓂᑦᑐᐊᕐᒥ
ᐅᖃᐅᔾᔨᒋᐋᖅᑎ, ᐃᖃᓇᐃᔭᖃᑎᖃᕐᓗᓂ ᐊᒻᒪᓗ ᐊᐱᖅᓱᕐᓗᓂ ᖃᒪᓂᑦᑐᐊᑉ ᐊᖑᓇᓱᐋᖅᑐᓕᕆᔨᒃᑯᑦ ᒥᑭᒋᐋᖃᒃᑎᓪᓗ ᑲᑐᔾᔨᖃᑎᒌᖏᓐᓂᑦ (HTA), ᐋᖅᑭᒃᓱᖅᓯᒪᓂᓕᐅᖅᓯᓚᐅᕐᒪᑕ ᐅᒪᔫᖃᑎᒋᒡᕕᐅᕙᒃᑐᒥᒃ ᐃᓕᖅᑯᓯᕆᓚᐅᖅᑕᖓᑎᑑᓕᖅᑎᑦᑎᓂᕐᒧᑦ ᐸᕐᓇᒍᑎᒥᒃ ᖃᒪᓂᑦᑐᐊᕐᒧᑦ, ᐊᔪᕆᑕᐅᓗᓂ ᐱᓕᕆᐊᖑᓯᒪᓂᖓ ᐊᑐᖅᑕᐅᓚᐅᖅᑐᖅ ᕿᑭᖅᑕᕐᔪᐊᕐᒧᑦ. ᐊᖑᓇᓱᐋᖅᑐᓕᕆᔨᒃᑯᑦ ᒥᑭᒋᐋᖃᒃᑎᓪᓗ ᑲᑐᔾᔨᖃᑎᒌᖏᑦ ᓇᓗᓇᐃᖅᓯᓚᐅᕐᒪᑕ ᓄᓇᓂᑦ ᐊᑐᖅᑕᐅᕙᒃᑐᓂᑦ ᐊᖑᓇᓱᐋᖅᑎᓄᑦ ᐊᒻᒪᓗ ᒥᑭᖐᐊᖃᒃᑎᓄᑦ ᐊᕙᑎᖏᓐᓂ ᖃᒪᓂᑦᑐᐊᑉ ᓄᓇᖓᓂ ᑕᐃᒃᑯᓂᖓ ᐃᓱᒪᒋᔭᐅᔪᓂᒃ ᓯᕗᓪᓕᐅᑎᔭᕆᐊᖃᒃᑎᑕᐅᓗᑎᒃ ᐃᓕᖅᑯᓯᕆᓚᐅᖅᑕᖓᑎᑑᓕᖅᑎᑕᐅᖁᔭᐅᓪᓗᑎᒃ. ᑐᒃᓯᕌᖑᔫᑉ ᓇᒦᓐᓂᖏᑦ ᐊᑐᓂ ᓄᓇᐃᑦ ᐃᒪᓐᓇᐅᔭᕆᐊᖃᒃᑎᑦᑎᓚᐅᕐᒪᑕ ᐲᔭᖅᑕᐅᑎᓪᓗᑎᒃ ᓴᓃᑦ ᐱᓕᕆᐊᖑᓚᑦᑖᕐᓗᑎᒃ ᐊᒡᔭᖅᑕᐅᕙᒡᓗᑎᒃ. ᑲᑎᒪᔨᑦ ᓇᓗᓇᐃᖅᓯᓚᐅᖅᑐᑦ ᑎᓴᒪᒡᒎᖅ ᐅᒥᐊᑦ ᐊᑐᖅᑕᐅᔭᕆᐊᖃᕋᔭᖅᑐᑦ ᐊᑐᖅᑕᐅᓗᑎᒃ ᑕᓪᓕᒪᓄᑦ ᐅᓪᓗᓄᑦ. ᐃᓱᒪᓕᐅᕈᑕᐅᓚᐅᕆᓪᓗᑎᒡᓗᑦᑕᐅᖅ ᑕᐃᒃᑯᐊ 12 ᐊᖑᓇᓱᐋᖅᑐᓕᕆᔨᒃᑯᑦ ᒥᑭᒋᐋᖃᒃᑎᓪᓗ ᑲᑐᔾᔨᖃᑎᒌᖏᓐᓂᑦ ᐃᓚᒋᔭᐅᔪᑦ ᐱᔭᐅᔭᕆᐊᖃᕋᔭᕐᒪᑕ ᐱᓕᕆᖁᓪᓗᒋᑦ ᐱᓕᕆᐊᖑᓚᕆᒡᓗᑎᒃ ᐲᔭᐅᕙᒡᓗᑎᒃ ᓴᓃᑦ. ᐱᓕᕆᐊᒃᓴᖅ ᐱᔭᕇᒃᑕᐅᓚᐅᖅᑐᖅ ᔫᓂ 2022−ᒥ.
ᓄᓇᙳᐋᖅ ᑕᑯᒃᓴᐅᑎᑦᑎᔪᖅ ᓇᒦᓐᓂᖓᓂᑦ ᖃᒪᓂᑦᑐᐊᑉ ᐃᖃᓗᖏᓐᓂᑦ ᐃᓕᖅᑯᓯᕆᓚᐅᑕᖓᑎᑑᓕᖅᑎᑕᐅᓇᓱᐊᕐᓂᖓᓂᑦ ᓇᒦᓐᓂᖏᓐᓂᑦ
ᑲᖏᖅᖢᒑᐱᒃ ᐃᓕᖅᑯᓯᕆᓚᐅᖅᑕᖓᑎᑑᓕᖅᑎᑕᐅᓂᖓ ᓇᓕᐋᖕᓄᐋᕐᕕᐅᕙᒃᑐᖅ ᐃᓯᕐᕕᖓ ᐅᑭᐅᖅᑕᖅᑑᑉ ᐃᖃᓗᖏᑕ
ᓄᓇᓕᒃ ᑲᖏᖅᖢᒑᐱᒃ ᒥᑭᔫᖕᒪᑦ ᕼᒪᓚ ᐃᓂᖃᒃᖢᓂ ᐊᒡᒍᐸᓯᐋᓂ ᓯᒡᔭᖓᓂ ᑲᖏᖅᖢᖔᐱᐅᑉ, ᕿᑭᖅᑖᓗᑉ ᐊᕕᒃᑐᖅᓯᒪᓂᖓᓂ ᓄᓇᕗᕐᒥ. ᐹᖓ ᑲᖏᖅᖢᒑᐱᐅᑉ ᑲᖏᖅᖢᐋᓄᖓᖕᒪᑦ ᑲᓇᓐᓇᖓᓂᑦ ᓄᓇᓖᑦ. ᐋᖅᑭᒃᓱᖅᓯᒪᓂᖓ ᑐᕌᖓᖕᒪᑦ ᐅᔭᕋᖕᓂᐊᕕᐅᕙᓚᐅᖅᓯᒪᓪᓗᓂ ᐲᓕᕆᓪᓗᑎᒃ ᑕᒫᓂ ᐃᓚᒋᔭᐅᓪᓗᑎᒃ ᐊᖅᑯᑎᑦ, ᐅᔭᕋᓱᒡᔪᖃᐅᖅᖢᓂ ᐊᒻᒪᓗ ᐅᔭᖅᑲᓂᑦ (ᐅᔭᕋᐃᑦ), ᐃᑳᖅᓯᓯᒪᓪᓗᓂ ᑰᖕᒥᑦ ᒥᒃᓵᓂᓪᓗᓂ 2,000 ᒦᑕᐃᑦ ᑰᖓᓂ ᑰᒋᐊᕐᓂᖓᓂᑦ. ᐊᖅᑯᑎ ᐃᑎᓗᐊᕐᓇᓂ ᐃᒪᖓᑕ ᐃᑎᓂᖓ ᐊᒻᒪᓗ ᐃᖏᕐᕋᔾᔪᑎᑦᑐᓄᑦ ᐃᑳᕐᕕᐅᔪᓐᓇᖅᖢᓂ.
ᐊᑐᖅᑕᐅᔪᓐᓃᖅᑐᖅ ᐃᑳᕐᕕᒃ ᐱᓕᕆᐋᖑᒋᐋᖅᓯᒪᖏᒻᒪᑦ ᑰᖕᒥ, ᑰᓗᐊᕈᓐᓃᖅᖢᓂ ᑰᒍᓯᖓᑎᑐᑦ ᐊᒻᒪᓗ ᓱᒃᑲᓕᓂᖅᓴᐅᓕᑦᑎᑦᑎᓪᓗᓂ ᑕᒪᓐᓇᓗ ᐱᐅᓈᖅᑎᑦᑎᓇᓂ ᐊᒃᑐᐃᓂᖓ ᑎᓱᔪᓄᑦ ᐅᑭᐅᖅᑕᖅᑐᕐᒥ ᐃᖃᓗᖏᓐᓄᑦ. ᓄᓇᓕᖕᒥᐅᑕᐃᑦ ᐅᖃᕐᒪᑕ ᐅᑎᓕᖅᑎᓪᓗᒋᑦ ᐃᖃᓗᒋᔭᕗᑦ ᒪᔪᕋᓱᐋᒡᒐᖅᑎᑕᐅᓲᖑᖕᒪᑕ ᓱᒃᑲᓕᓗᐋᕐᓂᖓᓄᑦ ᑰᖕᓂᖓᑕ ᐊᒻᒪᓗ ᐊᑖᓃᑐᐃᓐᓇᓕᖅᖢᑎᒃ ᐊᒡᕕᐋᓕᖅᑐᑉ ᑰᓗᐊᕈᓐᓃᓚᐅᖏᓐᓂᖓᓂ. ᐋᖅᑭᒋᐋᖅᓯᓂᕐᒧᑦ ᐸᕐᓇᒍᑎ ᐱᓕᕆᐊᖑᓕᓚᐅᕐᒪᑦ, ᐲᔭᖅᑕᐅᓪᓗᓂ ᑕᒪᓂᑦᑐᖅ ᐊᒡᕕᐋᖅᑐᖅ ᐃᓚᖓᓂ ᑰᑉ ᐊᒻᒪᓗ ᐅᑎᖅᑎᑕᐅᓪᓗᓂ ᑰᖕᓂᖓᓄᑦ ᑰᖕᓂᕆᖃᑦᑕᓚᐅᖅᑕᖓᑎᑑᓕᖅᑎᑕᐅᓪᓗᓂ.
ᓴᓪᓕᑦ ᐃᓕᖅᑯᓯᕆᓚᐅᖅᑕᖓᑎᑑᓕᖅᑎᑦᑎᓂᖅ ᓇᖅᓵᓗᑉ ᑰᖓᓂᑦ
ᓴᓪᓕᑦ ᑐᒃᓯᕋᓚᐅᕐᒪᑕ ᐲᔭᐃᖁᔨᓪᓗᑎᒃ ᐅᔭᕋᓱᒡᔪᖕᓂᑦ ᑎᓲᓂᑯᓂᑦ ᓴᐱᓯᓯᒪᔪᓂᑦ ᓇᓕᐋᖕᓄᐋᕐᓂᖏᓐᓂᑦ ᑕᒫᓂ ᓇᖅᓵᓗᑉ ᑰᖓᓂ. ᖃᐅᔨᒪᓂᓖᑦ ᐅᖃᐅᑎᖃᓚᐅᕐᒪᑕ ᐊᔪᕐᓇᖅᑐᖅᓯᐅᕐᓂᕋᒃᑕᐅᓪᓗᑎᒃ ᐃᖃᓗᐃᑦ ᒪᔪᕋᓱᐋᖅᑎᓪᓗᒋᑦ ᐃᒡᓕᓕᐋᕋᓱᐋᕐᓗᑎᒃ ᒪᕐᕉᓄᒃ ᑕᓰᖕᓄᒃ ᐅᖓᓯᒋᔮᓂᑦᑐᓄᑦ ᓯᒡᔭᐃᑦ, ᖃᔅᓰᓐᓇᐅᓂᖅᓴᐅᓕᕐᓂᕋᒃᑕᐅᓪᓗᑎᒃ ᐃᖃᓗᖏᑦ ᑖᒃᑯᓇᓂ ᑕᓯᕐᓂ, ᑮᓇᐅᔭᓕᐅᕋᓱᐋᕐᓗᑎᒃ ᐃᖃᓗᒐᓱᐊᕐᕕᐅᕙᒃᑐᓂ ᐅᑭᐅᖅᑕᖅᑑᑉ ᐃᖃᓗᖏᓐᓂᑦ, ᐃᓚᒋᔭᐅᓪᓗᑎᒃ ᐊᕐᕌᒍᓕᒫᒥ ᐆᒪᓇᓱᐊᕈᑕᐅᓗᑎᒃ ᐃᖃᓗᒐᓱᐋᕐᕕᐅᕙᒃᑐᓂᑦ, ᐃᖃᓗᒐᓱᐋᕐᕕᐅᕙᒡᓗᑎᒃ. ᐅᔭᖅᑲᐃᑦ ᑎᓲᖕᓂᑯᒥᓃᑦ ᐊᔪᕐᓇᖅᓯᑎᑦᑎᖕᒪᑕ ᐃᖃᓗᒐᓱᐋᖅᑎᑦ ᐅᐸᒍᑎᔪᓐᓇᕐᓂᖏᓐᓂᑦ ᐃᖃᓗᒐᓱᐋᕐᕕᐅᕙᒃᑐᓄᑦ ᑕᓯᕐᓄᑦ. ᑰᑉ ᐊᔪᖏᓐᓂᖅᓴᐅᓕᖅᑎᑕᐅᓂᖓᓄᑦ ᐱᓕᕆᐊᒃᓴᖅ ᑐᒃᓯᕌᖑᓚᐅᒪᑦ ᓈᒻᒪᒃᑐᒥᒃ ᐊᖅᑯᑎᖃᓕᖅᑎᑦᑎᔾᔪᑕᐅᔪᒪᓪᓗᓂ ᑕᓯᕐᓄᕆᐊᓂ ᑕᐅᕙᖓ ᐃᖃᓗᖕᓄᑦ ᓇᔪᖅᑕᐅᕙᒃᑐᓄᑦ ᐊᔪᕐᓇᖅᓯᑎᑕᐅᓯᒪᓂᖅᐹᖑᓯᒪᔪᓄᑦ.
ᐃᓕᖅᑯᓯᖓᑎᑑᓕᖅᑎᑕᐅᓂᖓ ᑰᑉ ᐱᓕᕆᐊᖑᒋᐊᓕᓚᐅᕐᒪᑦ ᐅᐱᕐᖔᖓᓂ 2020. ᐱᖓᓲᔪᖅᑐᑦ ᐊᖑᓇᓱᐋᖅᑎᑦ ᐅᑯᓇᖔᖅᓯᒪᔪᑦ ᐊᐃᕕᒃ ᐊᖑᓇᓱᐋᖅᑐᓕᕆᔨᒃᑯᑦ ᒥᑭᒋᐋᖃᒃᑎᓪᓗ ᑲᑐᔾᔨᖃᑎᒌᖏᓂᑦ ᐊᐅᓪᓚᓚᐃᕐᒪᑕ ᓯᑮᑐᒃᑯᑦ ᓄᓇᖓᓄᑦ, ᑕᐃᓐᓇᓗ ᐃᒪᓐᓇᑎᒋᐸᓗᒃ 150 ᑭᓗᒦᑕᓂᒃ ᐅᖓᓯᖕᓂᖃᒃᖢᓂ ᓄᓇᓕᖕᓂᑦ, ᐅᓯᔭᐅᓪᓗᑎᒃ ᐃᓘᓐᓇᑎᒃ ᐱᓕᕆᔾᔪᑏᑦ ᖃᒧᑎᓄᑦ (ᖃᒧᑎᒃ ᐃᖏᕐᕋᔪᓐᓇᖅᑐᑦ ᐊᐳᑎᒃᑯᑦ ᐊᒻᒪᓗ ᓂᓚᒃᑯᑦ). ᐅᔭᕋᓱᒡᔪᐃᑦ ᐲᔭᖅᑕᐅᒪᐅᖅᑐᑦ ᐱᓕᕆᐊᖑᓚᑦᑖᖅᖢᑎᒃ ᐊᑐᕐᓗᑎᒃ ᑲᐃᕘᑎᓂᒃ ᐊᒻᒪᓗ ᐅᔭᕋᑦᑎᐊᓂᑦ.
ᐅᑭᐅᒃᑯᑦ ᐊᖑᓇᓱᐋᕐᓂᕐᒥᑦ ᐱᐅᓂᖅᓴᐅᓕᖅᑎᑦᑎᓇᓱᐋᕐᓂᑦ ᐃᖃᓗᖕᓂ
ᑕᐃᑦᓱᒪᓂ ᑲᑎᒪᖃᑎᖃᒃᑎᓪᓗᒋᑦ ᐊᒪᕈᒃ ᐊᖑᓇᓱᐋᖅᑐᓕᕆᔨᒃᑯᑦ ᒥᑭᒋᐋᖃᒃᑎᓪᓗ ᑲᑐᔾᔨᖃᑎᒌᖏᓂᑦ ᒫᔾᔨ 2021−ᒥ, ᑲᑎᒪᔨᐅᖃᑕᐅᔪᑦ ᐅᖃᐅᓯᖃᓗᐋᙳᐊᓚᐅᕐᒪᑕ ᐱᒻᒪᕆᐅᓂᖏᓐᓂᑦ ᐆᒪᓇᓱᐊᕈᑕᐅᕙᑦᑐᓂᑦ ᐅᑭᐅᒃᑯᑦ ᐃᖃᓗᒐᓱᐊᕐᓂᕐᒥᑦ ᐊᒻᒪᓗ ᐊᔪᕈᓐᓃᖅᓴᑎᑕᐅᔭᕆᐊᖃᕐᓂᖏᓐᓂᑦ ᒪᒃᑯᒃᑐᐃᑦ ᓄᓗᔾᔨᕋᓱᐋᕐᓂᕐᒥᑦ ᐊᒻᒪᓗ ᐋᖅᑭᐅᒪᑎᑕᐅᓇᓱᐋᕐᓗᑎᒃ. ᐊᓯᐅᔨᔭᐅᓯᒪᔪᑦ ᓄᓗᐋᑦ, ᐊᓯᐅᔨᔭᐅᓯᒪᓂᖏᓐᓂ, ᐃᒋᑕᐅᔪᒥᓂᐅᑎᓪᓗᒋᑦ ᐅᕝᕙᓘᓐᓃᑦ ᕿᒪᐃᓐᓇᖅᑕᐅᔪᒥᓂᐅᑎᓪᓗᒋᑦ ᓄᓗᐋᑦ, ᐊᑲᐅᙱᓕᐅᕈᑎᒋᔭᐅᓂᖅᐹᖑᖕᒪᑕ. ᐊᒪᕈᒃ ᐊᖑᓇᓱᐋᖅᑐᓕᕆᔨᒃᑯᑦ ᒥᑭᒋᐋᖃᒃᑎᓪᓗ ᑲᑐᔾᔨᖃᑎᒌᖏᑦ ᒥᑭᓂᖅᓴᐅᓕᖅᑎᑦᑎᔪᒪᖕᒪᑕ ᐊᒥᓲᓂᖏᓐᓂᑦ ᐊᓯᐅᔨᔭᐅᖃᑦᑕᖅᓯᒪᔪᑦ ᓄᓗᐋᓂᒃ ᐃᖃᓗᐃᑦ ᐃᒪᖏᓐᓂ ᐱᔭᐅᑎᑦᑎᔪᒪᓪᓗᑎᒃ ᓄᓗᐋᓂᒃ ᐋᖅᑭᒃᓯᕕᒋᓯᒪᔪᓂᑦ ᐅᑎᖅᑎᑦᑎᔪᑕᐅᔪᓐᓇᕋᔭᖅᑐᓂᒃ ᐱᓕᕆᔾᔪᑎᖃᕐᓗᑎᒃ ᐊᒻᒪᓗ ᐊᔪᕈᓐᓃᖅᓴᑎᑕᐅᓗᑎᒃ ᐃᓚᒋᔭᐅᔪᑦ ᖃᓄᖅ ᑕᒪᒃᑯᓂᖓ ᐊᑐᕈᓐᓇᕋᔭᕐᒪᖔᑕ. ᓯᑰᑉ ᐊᑖᒍᖅᑎᑦᑎᔾᔪᑏᑦ ᐊᑐᖅᑕᐅᓱᖑᒪᑕ ᓄᓗᔾᔨᕈᑕᐅᓇᓱᐋᖅᖢᑎᒃ ᐃᖃᓗᒐᓲᑎᓂᒃ ᑕᓯᕐᒥ ᐅᑭᐅᒃᑯᑦ, ᐃᒫᖅᑎᑕᐅᓪᓗᓂ ᐱᑕᖅᓯᒪᔪᒃᑯᑦ ᓯᑯᒥ, ᕿᓚᒃᑕᐅᓪᓗᓂ ᐊᒃᖢᓇᐅᔭᕐᒧᑦ ᐊᒻᒪᓗ ᐱᓱᒃᑎᑕᐅᓕᕆᓪᓗᓂ ᓯᑰᑉ ᐊᑖᒍᑦ ᐊᑐᐋᖅᓯᑎᑕᐅᓪᓗᓂ ᑕᑭᓂᓕᒫᖓᓂᑦ ᓄᓗᐋᑉ ᐊᒻᒪᓗ ᓄᓱᒃᑕᐅᓕᕆᓪᓗᑎᒃ ᐊᓯᐊᒍᖔᖅ ᐱᑕᖅᑕᐅᓯᒪᔪᒃᑯᑦ ᓯᑯᒥ ᐃᓱᐋᒍᑦ ᓄᓗᐋᑉ. ᓇᓂᓯᔾᔪᑎᐅᑉ ᐱᓕᕆᔾᔪᑎᖓ ᐱᔭᐅᓂᐅᓴᑐᐃᓐᓇᖅᑎᑦᑎᖕᒪᑦ ᑕᓱᖅᑕᐅᒐᔭᕐᓂᖏᓐᓂᒃ ᐊᑐᓂ ᓄᓗᐋᑦ, ᐊᒃᓲᓂᖅᓴᖅ ᐊᑐᕐᓂᐅᓴᖏᓐᓂᖅᓴᐅᓕᖅᑎᑦᑎᓪᓗᓂ ᐊᓯᐅᔨᔭᐅᑐᐃᓐᓇᕆᐊᖃᕐᓂᖏᓐᓂᑦ ᓄᓗᐋᑦ ᐅᑭᐅᒃᑯᑦ ᐃᖃᓗᒐᓱᐋᖅᑐᖃᒃᑎᓪᓗᒍ.
ᕿᑭᖅᑖᓗᒃ ᐊᕕᒃᑐᖅᓯᒪᓂᖓ: ᑭᓱᖃᕐᓂᐅᕙᒃᑐᑦ ᐃᓕᖅᑯᓯᕆᓚᐅᖅᑕᖓᑎᑑᓕᖅᑎᑦᑎᓂᖅ ᕿᑭᖅᑕᕐᔪᐊᒥ
ᐃᓚᖏᑦ ᓯᒡᔭᐃᑦ ᓇᒦᓐᓂᖏᑦ ᐊᕙᑎᖏᓐᓂ ᕿᑭᖅᑕᕐᔪᐊᑉ ᐱᐅᔪᓐᓃᖅᐸᓪᓕᐋᓕᑉᒪᑕ, ᐊᒃᑐᐃᓪᓗᑎᒃ ᓇᓕᐋᖕᓄᕋᕈᓐᓇᕐᓂᖏᓐᓂᑦ ᐊᒻᒪᓗ ᐊᖑᓇᓱᐋᕐᕕᐅᕙᒃᑐᑦ ᖃᓄᐃᓕᖓᓂᖏᓐᓂᑦ ᓄᓇᓕᖕᒧᑦ. ᑕᐃᑲᓂ ᓯᒡᔭᖏᓐᓂᑦ ᐃᓕᖅᑯᓯᕆᓚᐅᖅᑕᖓᑎᑑᓕᖅᑎᑦᑎᓂᑦ ᓄᓇᕗᕐᒥ−ᐅᐸᒐᒃᓴᐅᑎᑦᑎᓚᐅᕐᒪᑕ ᑲᑎᒪᔨᑦ ᑲᑎᒪᑎᑕᐅᓂᖏᓐᓂᑦ ᐊᐅᒍᓯ 2021−ᒥ, ᓄᓇᓕᒃ ᑐᒃᓯᕋᓚᐅᕐᒪᑦ ᐃᑲᔪᖅᑕᐅᔪᒪᓪᓗᓂ ᐱᐅᓂᖅᓴᐅᓕᖅᑎᑕᐅᖁᓪᓗᖏ ᓯᒡᔭᐃᑦ ᑭᒡᓕᖏᑦ ᑭᓱᖃᕐᓂᐅᕙᒃᑐᑦ ᐱᓕᕆᐊᖑᓇᓱᐊᖁᓪᓗᒋᑦ ᐆᒪᔪᐃᑦ ᐊᒻᒪᓗ ᖃᓄᐃᖏᓐᓂᖏᓄᑦ ᐊᑦᑕᖅᑐᓂᖅᓴᐅᓗᑎᒃ ᐅᒪᖃᑎᒌᒡᕕᐅᕙᒃᑐᑦ, ᑕᒪᓐᓇᓗ ᐱᐅᓂᖅᓴᐅᓕᖅᑎᑦᑎᒐᔭᕐᒪᑦ ᐱᔭᐅᔪᓐᓇᕐᓂᖏᓐᓂᑦ ᐊᑑᑎᖃᕐᒃᓂᖅᐹᑦ ᐊᖑᓇᓱᐋᕐᕕᐅᕙᒃᑐᓂᑦ, ᐃᓕᖅᑯᓯᒃᑯᑦ ᖃᓄᐃᓘᕐᕕᐅᕙᒃᑐᓂᑦ ᐊᒻᒪᓗ ᐆᒪᓇᓱᐊᕈᑕᐅᓗᑎᒃ ᓂᕿᒃᓴᖅᓯᕕᐅᕙᑦᑐᓂᑦ. ᓇᑦᑎᕙᒃ ᐊᖑᓇᓱᐋᖅᑐᓕᕆᔨᒃᑯᑦ ᒥᑭᒋᐋᖃᒃᑎᓪᓗ ᑲᑐᔾᔨᖃᑎᒌᖏᑦ ᓇᓗᓇᐃᖅᓯᒪᐅᕐᒪᑕ ᐊᒥᓱᑲᓪᓚᖕᓂᑦ ᓇᒦᓐᓂᖏᓐᓂᑦ ᐊᑐᖅᑕᐅᕙᒃᑐᓂᑦ ᐊᖑᓇᓱᐋᖅᑎᓄᑦ ᐊᒻᒪᓗ ᒥᑭᒋᐋᖃᒃᑎᓄᑦ ᐊᕙᑎᖏᓐᓂ ᕿᑭᖅᑕᕐᔪᐊᑉ ᓇᔪᒐᖓᓂ ᑕᐃᒃᑯᐊᓗ ᐃᓱᒪᒋᔭᐅᓪᓗᑎᒃ ᓯᕗᓪᓕᐅᑎᔭᕆᐊᖃᒃᑐᕆᔭᐅᓪᓗᑎᒃ. ᐃᓕᖅᑯᓯᕆᓚᐅᖅᑕᖓᑎᑑᓕᖅᑎᑕᐅᔭᕆᐊᖃᕐᓂᖏᓐᓂᑦ. ᑐᒃᓯᕌᖑᔫᑉ ᓇᒦᓐᓂᖏᑦ ᐊᑐᓂ ᓄᓇᐃᑦ ᐃᒪᓐᓇᐅᔭᕆᐊᖃᒃᑎᑦᑎᓚᐅᕐᒪᑕ ᐲᔭᖅᑕᐅᑎᓪᓗᑎᒃ ᓴᓃᑦ ᐱᓕᕆᐊᖑᓚᑦᑖᕐᓗᑎᒃ ᐊᒡᔭᖅᑕᐅᕙᒡᓗᑎᒃ. ᑕᒪᓐᓇᐅᑎᓪᓗᒍ ᓇᒻᒪᓈᕆᒋᐋᕐᓂᖅ ᑐᒃᓯᕌᖑᓯᒪᔪᒧᑦ ᐱᓕᕆᓂᐅᒐᔭᖅᑐᒥᒃ ᐊᒻᒪᓗ ᑐᕌᖓᔪᑦ ᐊᑭᖏᓐᓄᑦ, ᐊᖏᖃᑎᒋᒍᑕᐅᓕᓚᐅᖅᐳᖅ ᑕᐃᒃᑯᐊ ᑕᓪᓕᒪᑦ ᓄᓇᐃᑦ ᐱᓕᕆᐊᖑᔪᓐᓇᕋᔭᖅᑐᕆᔭᐅᓪᓗᑎᒃ ᐃᓕᖅᑯᓯᕆᓚᐅᖅᑕᖓᑎᑑᓕᖅᑎᑕᐅᓇᓱᐋᕐᓗᑎᒃ.
ᕿᑎᕐᒥᐅᑦ: ᓄᓗᐋᓂᑦ ᑕᐅᖅᓰᖃᑎᖃᕐᓂᖏᑦ ᖁᕐᓗᖅᑑᑉ, ᑕᓗᕐᔪᐊᑉ ᐊᒻᒪᓗ ᑰᒑᕐᕉᑉ
ᑐᙵᕕᒋᓗᒋ ᑲᔪᓯᑦᑎᐋᕋᑖᓚᐅᖅᑐᑦ ᓄᓗᐋᓂᑦ ᑕᐅᖅᓰᔾᔪᑎᖃᕐᓂᕐᒧᑦ ᐱᓕᕆᔾᔪᑎᓂ 1990−ᖏᓐᓂ ᑕᐃᒃᑯᐋᓗ ᐱᑎᑕᐅᓪᓗᑎᒃ ᐃᖃᓗᒐᓱᐋᖅᑎᑦ ᑕᐅᖅᓰᔪᑎᖃᕐᓗᑎᒃ ᓄᓗᐋᑐᖃᕐᓂᑦ ᐊᖏᓂᖅᓴᓂᑦ ᐊᑎᑐᓂᓕᖕᓂᑦ ᐊᖏᓂᓕᖕᓂᑦ, ᓄᓇᓕᖓ ᖁᕐᓗᖅᑑᑉ ᐃᑲᔪᖅᑕᐅᔾᔪᑎᖃᕈᒪᓚᐅᕐᒪᑦ ᐊᔾᔨᐸᓗᖏᓐᓂᑦ ᓄᓇᓕᓕᒫᓂᑦ ᓄᓗᐋᓂᑦ ᑕᐅᖅᓯᖃᑎᖃᓂᕐᒧᑦ. ᓄᓇᓕᒃ ᓇᓗᓇᐃᖅᓯᓚᐅᕐᒪᑦ ᐱᔭᕆᐋᖃᕐᓂᕐᒥᓂᑦ ᐃᖃᓗᒍᑕᐅᑦᑎᐋᕈᓐᓇᖅᑐᓂᒃ ᐱᓕᕆᔾᔪᓯᕐᓂᑦ ᐃᑲᔪᖅᓱᖅᑕᐅᔪᒪᓪᓗᑎᒃ ᐆᒪᓇᓱᐊᕈᑕᐅᔪᓐᓇᕐᓗᑎᒃ ᐃᖃᓗᑦᑎᓐᓂᒃ ᐃᖃᓗᒐᓱᐊᕐᓂᑦ, ᑕᐃᒃᑯᐊᓗ ᐃᖃᓗᒐᓱᐋᖅᑕᐅᓲᖑᓂᖅᓴᐅᓪᓗᑎᒃ ᒪᑦᑎᒃᑕᐅᑎᓄᑦ ᓄᓗᐋᓄᑦ. ᑕᒪᓐᓇ ᑕᐅᖅᓯᖃᑎᖃᕐᓂᖅ ᓄᓗᐋᓂᑦ ᐃᓱᒪᒋᔭᐅᓚᐅᕐᒪᑦ ᐃᑲᔪᖅᑐᕆᔭᐅᓪᓗᓂ ᑕᐅᕗᖓᑐᖃᒃ−ᐊᑐᕈᓐᓇᕋᔭᕐᓗᓂ ᓄᖒᑦᑎᕙᓪᓕᐊᑎᑦᑎᖏᓐᓂᖅ ᐃᖃᓗᒐᓱᐋᖅᑎᓂᑦ, ᑭᒡᓕᓕᑎᑦᑎᓯᒪᓗᑎᒃ ᐃᖃᓗᒡᕕᒃᓴᐅᔪᓂᑦ ᕿᓇᔭᒡᓗᑎᒃ ᐱᕕᖃᒃᑎᑕᐅᓗᑎᒃ ᐊᒥᓱᓂᖅᓴᐃᑦ ᐃᖃᓗᐃᑦ ᐊᓂᒍᐃᔪᓐᓇᖁᓪᓗᒋ ᓄᓗᐋᓂᑦ ᐊᒻᒪᓗ ᐃᑲᔪᖅᑕᐅᓗᑎᒃ ᒥᑭᓚᖑᑎᑕᐅᓗᑎᒃ ᐃᖃᓗᒃᑕᐅᓂᖏᑦ ᐃᖃᓗᕋᓛᖑᓂᖅᓴᐃᑦ ᐊᒻᒪᓗ ᒥᑭᓗᐊᖅᑐᑦ ᐃᖃᓗᐃᑦ. ᐱᔾᔪᑎᒋᓪᓗᒍ ᓄᕙᖕᓇᕐᔪᐊᖅ-19 ᐊᔪᓕᖅᑎᑦᑎᓂᖓ, ᐃᓘᓐᓇᑎᒃ ᖃᐅᔨᒪᒋᐋᖅᓯᓃᑦ ᐱᓕᕆᐊᖑᓇᓱᐋᖅᑐᑦ ᖁᕐᓗᖅᑐᕐᒥ ᓄᖃᒃᑎᑕᐅᓚᐅᕐᒪᑕ ᐊᒻᒪᓗ ᑮᓇᐅᔭᖃᒃᑎᑦᑎᔾᔪᑎᑦ ᐊᑐᖅᑕᐅᓕᓚᐅᖅᖢᑎᒃ ᓯᐋᒻᒪᖅᑎᑕᐅᓂᖅᓴᐅᖁᓪᓗᒍ ᓄᓗᐋᓂᑦ ᑕᐅᖅᓰᔾᔪᑎᖃᕐᓂᕐᒧᑦ ᐱᓕᕆᔾᔪᑎ ᒪᕐᕉᖕᓄᒃ ᐊᓯᖏᓐᓄᑦ ᓄᓇᓖᖕᓄᒃ (ᑕᓗᕐᔪᐊᕐᒧᑦ ᐊᒻᒪᓗ ᑰᒑᕐᕈᖕᒧᑦ) ᑭᖑᓂᖓᒍᑦ ᑐᒃᓯᕋᓚᐅᖅᑎᓪᓗᒋᒃ ᑖᒃᑯᐊᒃ ᓄᓇᓖᒃ.
